Train Ke Dibbe

— A Personal Reflection

Aaj ki iss bhaag-daud aur social media ki generation mein hum itne aage nikal gaye hain ki shayad iss race mein hum bahut kuch chhodte ja rahe hain. Aur hairani ki baat ye bhi hai ki hume pata hi nahi ki hume jana kahan hai, hamari destination kya hai. Probably hamari destination hai — dissatisfaction, greed, exhaustion, isolation aur maut.

Aaj ki iss generation mein humare dost, rishtedaar aur parivaar — kahin na kahin hum sab digitalise ho gaye hain. Digitalisation galat nahi hai, lekin iska matlab ye bhi toh nahi ki hum yatharth se muh mod lein. Aaj humare social media apps par hazaaron dost, yaar aur rishtedaar hote hain. Unse hum messages, status, stories etc.. ke through connected rehte hain, lekin prashn ye hai ki kya ye sab rishte sach much hote hain? Ya phir ek dikhawa hai, ek formality hai, ek illusion hai?

Aap payenge ki social media par aapke hazaaron connections hon aur aapko iska abhimaan bhi ho shayad. Lekin jis din aap jeevan ke uss sangharsh mein honge jahan aapko unki sabse zyada zarurat hogi, toh yakeen maaniye ye saare connections sirf contacts bankar hi reh jayenge. Aapka aur unka rishta bas itna hi hoga jitna train mein safar kar rahe do yatriyon ke beech hota hai. Chunav aapka hoga ki aap apne jeevan ko ek train ke dabbe mein bitana chahte ho, ya aapki koi apni duniya train ke bahar bhi hai.

Social media ke iss daur mein hum daily hazaaron logon se status, posts aur stories etc.. ke through connected hote hain. Aur hume lagta hai ki humare paas bahut log hain jo hamare liye chintit hain, hamari care karte hain. Dhyaan dijiye, hum apne social platforms par posts waise hi daalte hain jisse hume attention mile. Hum logon ki nazar mein achha banna chahte hain — lekin kya yahi rishton ki maulikta hai?

Kis prakar ka sambandh hai ye, jahan hum khud ko freely express nahi kar sakte? Hum apne thoughts bhi waise hi present karte hain jo dusron ko impress karein. Dhyaan rakhiyega, agar aap bhi aisa hi karte hain toh aapke chahne wale log aapse nahi, aapke mukhote se lagaav rakhte hain. Aur jis din aapka ye dikhawa chhootega, aap paoge ki aap andar aur bahar dono taraf se khokhle ho.

Mere anusaar jeevan ek race nahi, ek safar hai — aur aapko iss safar ka anand lena chahiye, na ki nimn cheezon mein padkar ise barbaad kar dena chahiye. Aap jis bhi race mein daud rahe hain, rukiye, sochiye aur samajhne ki koshish kariye — kya aap kewal iss liye nahi daud rahe ki aap apne bhavishya ke sapne dekh rahe hain?

Future ke liye concerned rehna galat nahi hai. Bahut achhi baat hai ki aap apne aane wale samay ko khubsurat banana chahte hain, lekin iss race mein agar hum apna aaj hi gawa dein, toh ye sahi nahi hai. Taoism aur Buddhism ki philosophy bhi yahi kehti hai ki jeevan na bhoot ka naam hai, na bhavishya ka — jeevan vartamaan hai. Vartamaan mein kiye gaye chunav hi aapka bhavishya banate hain, aur aapke chunav sahi hon, iske liye bahut zaruri hai ki aap thoda rukkar sochein aur bodhpurvak sahi nirnay lein.

Social media ki iss generation mein hum yatharth se koi sambandh rakhte hi nahi. Humara pehenawa, humare goals, humare rishte — ye sab kahin na kahin fareb aur dikhawa ban gaye hain. Ye ek sahi example ho sakta hai — mere WhatsApp etc... se bahut se log connected hain, frequently active rehte hain posts aur stories ke through, lekin bahut kam hi log honge jo mere iss article ya thoughts ko padh rahe honge.

Vastav mein jinhe sach much mujhse lagaav hota, wo mere posts ke liye meri iss website par aate. Lekin jo kewal formality nibhana jaante hain, wo bas social media apps tak hi simit reh gaye. Maine iss website ko issliye banaya hai taki yahan main freely apne thoughts, apni thinking, apne experiences aur moments share kar paun. Halaanki inhe dekhne aur padhne walon ki sankhya bahut kam hogi, lekin mujhe vishwas hai ki jo bhi honge, wo genuine honge.

Jinke saath shayad main apne experiences, thoughts aur ideas sach mein share kar paunga. Aur sabse badi baat — main iss illusion mein nahi rahunga ki mere paas bahut log hain. Main iss baat se santusht rahunga ki mere paas kuch hi log hain, lekin wo genuine hain. Jo mere pehenave se nahi, mere roop-rang se nahi, mere filters se nahi, balki mere thoughts aur ideas se connected hon. Jo bas contacts nahi, balki companions hon.

Kyuki bheed ka hissa banna aasaan hai, lekin sach mein kisi ke jeevan ka hissa banna bahut kathin. Mujhe hazaaron contacts nahi chahiye, mujhe kuch aise log chahiye jo screens ke uss paar sirf naam ya profile bankar na reh jaayein. Jo meri awaaz hi nahi, meri khamoshi bhi samajh sakein. Jo likes aur reactions se nahi, samvedana aur satyata se jude hon.

Aur shayad wahi asli sambandh hote hain — jahan insaan profile nahi, vyakti bankar milta hai. Jahan baatcheet notifications se nahi, feelings se chalti hai. 

  10:56

23 May 2026

Author's Note

The reflections, observations, and analyses presented in this article represent the intellectual work of Shivam Advait. This article is offered as a contribution to thoughtful inquiry and reflection. Readers are encouraged to engage with its contents critically, independently, and in a spirit of open dialogue.

— Shivam Advait