Mai Ladki Hoon?

— A Personal Reflection

Haal hi mein maine ek kavita apne status par lagaya tha. Kavita kuch iss prakar tha: “Jab Mai Kamaungi.....”

Issi kavita ke sandarbh mein mere kisi parichit ne apni jigyasa prastut karni chahi, unka message kuch yun tha: “Abey, tu ladki hai kya?”

Prastuta shayad issi soch ke karan samaj mein istri aur purush, in do vargon ke beech itni asahajta hai. Hum pehle se nirdharit karke baithe hote hain ki purush dash dash dash.... hain aur istri dash dash dash.... hain. Kamane ka haq, jeevan jeene ka haq, sapne dekhne ka haq aur duniya samajhne ka haq toh kewal purush ka hi hai; istriyaan toh kewal ek pashu-matra hain. Unka kaam kewal garbh dharan karna, bachche ki dekhbhal karna aur ghar ke kude-kachre saaf karna hai.

Kya ye samanta usi soch ko nahi dikhati jahan aap ek gaye ko khub khilate-pilate ho taki wo dudh de sake, jisse aapka bank balance badhe; aur jab wo gaye dudh dena band kar deti hai toh use sadkon par ya fir kasaikhano mein bech diya jata hai? Aur hum bahut abhiman se kehte hain ki “Gaye Humari Mata Hai”.

Maaf kariyega, lekin mera ye manana hai ki iss dhara par bhagwan ne istri ko ek adhik capability di hai. Matritva ki. Toh wo bas isliye ki wo ek navsishu ka nirmaan kar iss prakriti ka sanchalan kar sake. Parantu agar unki ye strength hi unke shoshan ka karan ban jaye, toh ye prakriti ke virudh jana hoga. Aur sadaiv yaad rakhiyega, prakriti hamesha apna badla leti hai, ab chahe wo jis roop mein le. Dhara par jisne bhi janam liya hai, use jeene aur swatantra rehne ka adhikar hai. 

“Mai ladki hoon?” Iss prashn ka uttar dena mere liye thoda kathin avashya hai, kyunki mai swayam nahi janta mai kaun hoon. Mai ye sharir hoon, ya man hoon, ya buddhi hoon, ya koi kalpana matra hoon, Mai nahi janta. Mere paas abhi in sab prashnon ka uttar nahi hai. Lekin bas itna avashya janta hoon ki mera ye sharir jis kokh se aaya hai, wo ek istri ki kokh thi, aur shayad isi karan mera ye sharir bhi kisi istri ke sharir ka hi bhaag hai. Agar aap dhyaan se dekhen toh istri aur purush jaisa koi bhed vastav mein hai hi nahi - hum sab toh ek istri ka hi bhaag hai na.

Ek prashn aapka tha jiska uttar maine diya, ab kuch prashn mere hain jinka uttar mai aapse chahunga. Kya istri bas ek object of attraction ka hi pratik hai? Kya istri ke liye uska sundar hona adhik aawashyak hai? Kya sundarta kewal sharir ki chamak hai, ya bodh ka prakash hai? Mere dwara posted uss kavita par jis kisi ke bhi ye vichaar the, mai usse puchna chahta hoon — kya reason hai ki uss kavita mein aapko bodh se purva istri ka hi smaran aaya?

Shayad yehi sach hai ki istri ko humne kewal ek object bana diya hai. Dhyaan dijiyega, jute-chappal ke dhabe se lekar sharab ki bottle tak, kisi 5 star mall se lekar kisi mandir ke bagal mein lage jewellery ke advertising poster tak, har jagah humne vigyapan ke liye istri ka photo hi lagaya hua hai. Jis samaj mein humein bodh ko mahatv dena tha, humne sharir ko de diya. Yehi humari sabse badi asafalta hai

Iss umeed ke saath ye article likh raha hoon ki jo bhi ise padh rahe honge — purush, istri, ya yun kahen insaan — wo iss baat ki gambhirta ko samjhenge aur samaj mein panap rahe iss agyaan ke andhere ko hatane ki koshish karenge. Mai nahi kehta ki aandolan karne nikal jaiye, lekin kam se kam swayam se toh prayas kijiye. Jab aap badalenge, aapki mentality badlegi, toh aapke agal-bagal wale bhi aapse prerana lenge. Maine iss article ko taane maarne ke uddeshaye se nahi likha, lekin mujhe pratit hua ki iss par kuch likhna shayad aawashyak hi tha.

Author's Note

The reflections, observations, and analyses presented in this article represent the intellectual wtation, the underlying ideas, interpretations, and conclusions remain those of the author. This article is offered as a contribution to thoughtful inquiry and reflection. Readers are encouraged to engage with its contents critically, independently, and in a spirit of open dialogue.

— Shivam Advait